LXXXIII

Les longs cheveux de la Gaule Celtique:
Accompagnez d'estranges nations:
Mettront captif la gent Aquitanique,
Pour succomber à leurs intentions.

LXXXIV

La grand cité sera bien desolee,
Des habitans un seul n'y demourra:
Mur, sexe, temple, & vierge violee,
Par fer, feu, peste, canon peuple mourra.

LXXXV

Par cité prinse par tromperie & fraude
Par le moyen d'un beau ieune attrapé,
Assaut donné Raubine pres de Laude,
Luy & tous morts pour avoir bien trompe.

LXXXVI

Un chef d'Ausonne aux EsPaijxnes ira,
Par mer sera arrest dedans Marseille,
Avant sa mort un long temps languira,
Apres sa mort on verra grand merveille.

LXXXVII

Classe Gauloise n'aproches de Corsegne.
Moins de Sardaigne tu t'en repentira:
Trestous mourrez frustrez de l'aide grogne,
Sang nagera, captif ne me croiras.

LXXXVIII

De Barselone par mer si grand'armee,
Toute Marseille de frayeur tremblera:
Isles saisies de mer ayde fermee,
Ton traditeur en terre nagera.